La vischnanca da Cazas planisescha in pass impurtant en direcziun energia regenerabla. A la saira d'infurmaziun ha la vischnanca preschentà ses plans da construir in implant fotovoltaic sin la «Präzer Höhi». Il project duai vegnir realisà en collavuraziun cun l'interpresa d'energia da Turitg EWZ. Oriundamain era planisà ch'i vegnia decis a la radunanza communala dals 14 d'avrigl davart il project. Pervia da las grondas discussiuns vegn quai dentant spustà, sin cura n'è anc betg enconuschent.
In project ambiziunà cun potenzial
Il project preschentà è ambiziunà: En tut 20'000 moduls fotovoltaics duain vegnir installads sin las structuras da l'implant solar. I cuzzass tenor las infurmaziuns da l'EWZ trais stads da construir l'implant solar. Planisà fissi da cumenzar la stad dal 2027 e finir il 2030.
L'implant solar sin la muntogna produciss radund 11 uras gigawatt ad onn, communitgescha l'EWZ – avunda per cuvrir il basegn da l'entira vischnanca durant l'entir onn. La vischnanca da Cazas spetga era auters numerus avantatgs dal project solar. Per l'ina profitass la vischnanca da Cazas finanzialmain: La vischnanca survegniss mintg'onn in tschains per metter a disposiziun il terren sin il qual che l'implant solar sa chatta. In rap sin mintga ura kilowatt che vegn producida fiss il tschains – quai muntass entradas da bun 110'000 francs ad onn. Plinavant purtass la realisaziun da l'implant solar era novas plazzas en la regiun.
Tschertas sfidas restan
Sper las schanzas cuntegna il project era sfidas.
- Intervenziun en la natira: La construcziun da l'installaziun munta ina intervenziun en il spazi alpin. Per mantegnair las consequenzas il pli bassa pussibel èn necessaris examens cumplessivs da la cumpatibilitad cun l'ambient.
- Visibilitad da l'installaziun: Quant bain che l'installaziun duai esser visibla da la val, sto vegnir examinà cun resguard da las consequenzas sin il maletg da la cuntrada.
- Logistica ed access: La construcziun en terren alpin tschenta pretensiuns spezialas a la logistica. Las vias da transport ston vegnir planisadas per mantegnair las consequenzas per l'ambient e per ils abitants il pli bass pussibel.
- Acceptanza en la populaziun: Per il success dal project è decisiva l'acceptanza en la populaziun. La vischnanca planisescha perquai d'infurmar la populaziun cumplettamain davart il project e da la integrar en il process da decisiun.
L'avantatg d'energia solara en las muntognas
Durant ils dis curts da l'enviern sa reducescha la producziun d'energia solara en la planira fermamain – lieus alpins han qua in grond avantatg cunquai che la irradiaziun resta pli auta durant ils dis d'enviern. La Präzer Höhi è tenor mesiraziuns situada idealmain, spezialmain durant il temp d'enviern. Plinavant reflecteschia la naiv sin quella autezza ils radis dal sulegl. Studis mussan che installaziuns alpinas pon producir durant l'enviern fin a trais giadas tanta energia per surfatscha sco installaziuns cumparegliablas en la planira.
