Siglir tar il cuntegn

Parc Ela Project per salvar l’avieul periclità

L’avieul-tagliafeglia da costs (Stängel-Blattschneiderbiene) è ina da las spezias d’avieuls selvadis las pli raras en Svizra. Ella cumpara quasi be en il Grischun. Per salvar ses spazi da viver lantscha il Parc Ela in project da protecziun sur quatter onns.

In referat dals 23 da mars en il Kurhaus Bergün è stà il start uffizial per il nov project dal Parc Ela. Quel ha la finamira da mantegnair l’avieul-tagliafeglia da costs. Radund 60 persunas han visità il referat, ha ditg Dino Augustin dal Parc Ela. Quest avieul spezial è dependent da plantas raras sco la rena giganta (Riesen Haarstrang), ch'è en privel da svanir. Ensemen cun differents partenaris duain vegnir realisadas mesiras per optimar ils spazis da viver per la spezia periclitada.

Persunas interessadas pon sa participar a differentas occurrenzas, per exempel al martgà da plantinas a Cuira ils 17 da matg – nua ch'igl è pussaivel da cumprar renas gigantas – u a la festa dals baus a Lantsch/Lenz ils 2 da fanadur. Ultra da quai cloma il Parc Ela en il rom d’in project da Citizen Science da registrar sch'ins vesa quest avieul.

Or da l'archiv:

Il mund dals avieuls – selvadis u en l'apicultura – faszinescha. RTR ha dà pliras invistas en connex cun ils animals impurtants.

RTR actualitad 17:00

Artitgels legids il pli savens