L'entschatta d'avust racoltan ils apiculturs il mel en il Grischun, uschia er a S-chanf en l'Engiadina. Mathilda e Roman Pernisch han dapi 26 onns pievels d'avieuls e fan ses agen mel. Actualmain han els 14 pievels d'avieuls cun mintgamai ina regina.
-
Bild 1 von 5. En quest char verd vivan ils avieuls da Mathilda e Roman Pernisch. Bildquelle: RTR.
-
Bild 2 von 5. L'entrada dal char verd, nua ch'ils avieuls vivan. Bildquelle: RTR.
-
Bild 3 von 5. Cura ch'ins avra ina da las 14 portas pitschnas, ves'ins avieuls vi da la lavur. Bildquelle: RTR.
-
Bild 4 von 5. Sin mintga porta stat in numer dad 1 fin 14 e las infurmaziuns correspundentas davart il pievel d'avieuls. Bildquelle: RTR.
-
Bild 5 von 5. Cun quai han ins transportà pli baud las reginas, raquenta Roman Pernisch. Bildquelle: RTR.
Ma uss n'èsi anc betg avust ed il mel n'è anc betg madir. Roman e Mathilda Pernisch vegnan mintgadi tar ils avieuls per guardar co i va cun els e cun il mel. Per far quai ston els l'emprim ir in pèr minutas cun auto, fin ch'els arrivan tar ils avieuls. Ils 14 pievels d'avieuls vivan en in char verd amez in prà verd. Dasperas curra in pitschen flum, che dat als avieuls l'umiditad ch'els dovran.
Per controllar il mel han ils dus apiculturs da trair en mandura da protecziun. Latiers tutg'ina gronda giacca alva, in chapè cun ina rait davant la fatscha, chautschas lungas e guants cun ina gumma da chavels enturn la chanvella – per ch'ils avieuls na sgolan betg en las mongias.
Piztgadas d'avieuls tutgan semplamein tar la lavur – in apicultur che na vegn betg piztgà? Na, jau sun gist oz en damaun vegnì piztgà.
Malgrà questa protecziun na sajan ins betg cumplettamain immun cunter piztgadas, din ils dus apiculturs. Ma quai tutgia simplamain tar la lavur.
Cun la vestgadira da protecziun entran els lura il char verd. Uss n'hai anc nagins avieuls en là, ma quai vegn bainprest a sa midar: Cun calma avra Roman Pernisch ina da las 14 portas ed ils avieuls sgolan ora. Cun in fol sufla el fim sin ils avieuls, tge che quietescha els.
-
Bild 1 von 5. Plansieu pren Roman Pernisch davent il vaider. Bildquelle: RTR.
-
Bild 2 von 5. Il fim quietescha ils avieuls. Bildquelle: RTR.
-
Bild 3 von 5. Cun ina zanga prenda el or in dals roms da lain. Bildquelle: RTR.
-
Bild 4 von 5. Roman Pernisch na porta nagins guants – el n'ha para betg tema da piztgadas. Bildquelle: RTR.
-
Bild 5 von 5. La gronda part dals avieuls è crudada giu, cura che l'apicultur ha spluntà sin il rom da laina. Bildquelle: RTR.
Cun ina zanga tegna el precautamain in dals roms da lain e prenda ora quel. Cun in pèr fridas crodan ils blers avieuls giu ed ins vesa cler e bain – las patgnas èn plainas cun mel. Sur il mel è ina fina stresa da tschaira clera. «Quest mel è pulit madir», di Roman Pernisch. «El è fitg gross. Cura ch'il mel n'è anc betg bun, dagutta tut engiu.»
Quai na veseva dentant betg adina or uschè positiv – la blera plievgia da las emnas passadas ha era gì ina influenza sin ils pievels d'avieuls. Sch'i plova, restian tut ils avieuls en l'avieuler, declara l'apicultur. Uschia dettia lura er damain nectar. Ils avieuls han dentant pudì prender suenter bain quai las duas ultimas emnas.
Quest temp è magari stà mal, ma las duas ultimas emnas hai puspè dà fitg bler mel – nus essan propi fitg cuntents.
Per ils dus apiculturs è lur lavur ina passiun – pertge per la paja na stoppian ins betg far questa lavur, din els. Ins gudogna fitg pauc sco apicultur. Els fan quai plitost per sasez. Roman Pernisch mangia in entir magiel mel ad emna, di el. Sia dunna Mathilda Pernisch fa diever sin differentas modas dal mel e la tschaira dals avieuls. Sa chapescha metta era ella il mel sin il paun, ma era per crear chandailas e itgs dovra ella quel.
-
Bild 1 von 2. Uschia vesa il mel finì ora ch'ils dus apiculturs vendan. Bildquelle: RTR.
-
Bild 2 von 2. Davant sia chasa penda ina tavla, per ch'ins vesa direct ch'i dat qua mel frestg da cumprar. Bildquelle: RTR.
Ma fin ch'il mel è madir, vegnan els mintga di tar lur avieuls e miran d'els. Impurtant è ch'i giaja bain cun tuts - e cunzunt cun la regina da mintga pievel.
Or da l'archiv