La Fundaziun da l'ospital Tusaun è fusiunada cun la Spitex Viamala. Plinavant èn er ils servetschs da salvament da l'ospital Tusaun e dal Center da Sanadad Savognin, sa mess ensemen al servetsch da salvament Grischun central. Er las praticas da medi ch'eran gia suttamessas a la fundaziun e la pratica d'uffants a Tusaun èn uss sut in tetg tar la Fundaziun ospital Tusaun. Entras quai è il manaschì creschì ferm, quai ha pretendì ina restructuraziun ch'ins ha uss er adattà entras ina roschada interna.
Tgira vegn partida en duas parts
La sparta tgira vegn da nov partida si en duas parts. La directura dal servetsch da tgira, Lisbeth Lischer surpiglia ina nova funcziun per installar in post da cussegliaziun. La planisaziun da sortidas, midadas tranter ospital e Spitex, servetschs sozials e cussegliaziun da geniturs sco er il servetsch paliativ, èn suttamess ad ella. Mladena Caviezel surpiglia da nov la rolla da manadra dal servetsch da tgira.
Directur surdat intginas incaricas
Il directur Reto Keller sa concentrescha en l'avegnir sin manar ils posts da stab ed ils manaschis partenaris ch'èn sur sasez. La sparta nova che vegn uschia stgaffida, surpiglia il manader d'enfin uss da la Spitex, Roman Stäbler. Quai munta ch'el è responsabel per servetschs ed il svilup dal manaschi. Ils blers projects, il management da qualitad ed il svilup dal manaschi dovrian adina dapli ressursas. Il post da manar la Spitex surpiglia la substituta d'enfin uss, Barbara Berni.
Da nov ina conferenza d'ospital
La sparta da las finanzas ed il controlling resta medem. Ed er en las spartas medicinalas resta tut sco fin qua. La direcziun consista da nov da set persunas. Per che la direcziun possia sa concentrar meglier sin ils temas operativs ils pli impurtants, è da nov vegnida creada la conferenza da l'ospital. Temas impurtants da las spartas che sa cruschan e da la collavuraziun interdisciplinara en l'ospital vegnan reglads en quest gremi.
