L'arena da biatlon ha inaugurà il nov vial per ir cun skis cun rodas. Il vial catramà è quatter kilometers lung. La planisaziun haja cuzzà dapli che diesch onns, scriva l'Arena da biatlon da Lantsch en ina communicaziun. Ils custs muntan a 3,3 milliuns francs.
Il pli aut punct dal nov vial dad ir cun skis cun rodas è sin 1'437 meters sur mar, per mintga runda ston vegnir surmuntads 87 meters d’autezza. Cun la prolungaziun dal vial da 1.6 sin ussa quatter kilometers datti la pussaivladad da far trenaments dad interval e plinavant possia il trenament vegnir pli cumplex, ha ditg Lukas Keel, il schef da Biatlon Swiss-Ski. Il nov vial na saja betg mo in gudogn per las squadras da biatlon, mabain era per passlung ed il sport da prestaziun.
Divers puncts culminants en l’Arena da biatlon
Il schaner da quest enviern èn ils campiunadis europeics a Lantsch, il december 2023 ha lieu la cuppa mundiala da biatlon ed il favrer 2025 datti in campiunadi mundial da biatlon.
Legenda:
Da sanester: Peter Barandun (vicepresident Swiss-Ski), Hannes Parpan (Cussegl administraziun Biatlon Arena Lai SA), Carola e Michael Hartweg (promoturs dal biatlon), Benedikt Zumsteg (CEO Roland Arena).
Roland Arena / Christian Danuser
