Anc l'entschatta da l'onn quintava Origen da pudair avrir la tur alva la fin zercladur, pia avant ch'il program da stad cumenzia. Mez matg èsi vegnì enconuschent che quest plan na va betg si. Cunquai manca er in lieu per far represchentaziuns. A curta vista hajan l'intendant Giovanni Netzer e ses team cunquai stuì s'organisar e tschertgar alternativas. Igl haja pretendì ina gronda flexibladad dal team d'organisaziun dal festival.
Da s'organisar da nov è in pensum da mamut, per tuts involvids.
I sajan guntgids sin duas alternativas a Mulegns, declera l'intendant Giovanni Netzer envers RTR. Uschia èn da nov planisadas occurrenzas en la sala da l'hotel Liun a Mulegns sco er en ina remisa. Quella remisa fin uss nunenconuschenta haja il festival pir cumprà avant paucs mais. I sa tracta d'in spazi grond che vegniva duvrà per deponer las charrotschas. Vinavant vesa l'intendant in avantatg dal retard: Uschia saja pussibel da far accessibel il plazzal da la tur alva al public.
Fragliuns èn il tema da la stad
Durant il festival da stad tematiseschan las differentas occurrenzas la tematica da fragliuns. Sin la tribuna dattan Kain ed Abel en il tun. In tozzel preschentaziuns sa drizzan a quest tema. Sa decidì per quest tema è l'intendant Netzer pervi da la situaziun globala actuala, sco era perquai ch'ina e scadin haja experientschas cun frars e soras, bunas e malas. Il temp dad oz fetschia vegnir endament ad el il Vegl Testament, ha declerà Giovanni Netzer.
Las emprimas preschentaziuns da cumedia èn il zercladur, quai en differents lieus grischuns. Da mez fanadur enfin mez avust stattan teaters cun musica, concerts e cunzunt represchentaziuns da saut sin il program.