La tur alva è pronta, uschia ha la fundaziun Origen communitgà ils proxims pass. Ils davos mais han ils architects da la scola politecnica da Turitg optimà ensemen cun l'inschinger da construcziun Jürg Conzett ed il patrun da construcziun Giovanni Netzer ils plans per la tur. Quella saja ussa pli filigrana e tuttina pli stabila, descriva resumond Conzett la tur. Per Netzer, l'intendant da la fundaziun Origen è la tur ussa ina cumbinaziun da culissa da e per teater, concerts, installaziun d'art, tur panoramica.
Ils plans èn ambizius. Il matg 2024 duess la tur esser pronta. Il mument èn inoltradas tar l'uffizi da construcziun da Surses las midadas da project. Proximamain vegn publitgà la dumonda da construcziun. Il medem mument lavura Origen vi da la finanzaziun dals 4,1 milliuns francs. L'october da quest onn duessan ils singuls elements vegnir stampads cun in betun alv spezial e silsuenter mess ensemen al lieu la primavaira.
La nova tur duess scriver vinavant l’istorgia da Mulegns ed interpretar da nov quella. Previs èsi ch'installaziuns d’art, turas auditivas e preschentaziuns da teater vegnan realisadas en quella tur.
En la sala cun ina cupla duess pender ina tribuna che porscha ina vista sin il vitg e tschiffa la saira ils davos radis dal sulegl, ha Origen scrit pli baud en ina communicaziun.
