Alvagni - Onn da giubileum cun blera glieud al runal

Durant ils dis da festa è blera glieud vegnida ad Alvagni per ir cun skis, per gronda part famiglias cun uffants. «Nus avain entschet pir ils 26 da december, ma nus essan fitg cuntents cun las frequenzas », di Risch Tscharner il president da la cooperativa. Dumbrà n'hajan ins betg, ma il parcadi saja savens stà plain.

Nagina pista cun il ratrac

Magari stoppian ins improvisar – uschia na saja quest onn per exempel betg stà pussaivel da far pista cun in ratrac pervi da la pitschna cuverta da naiv. Cun in quad saja dentant stà pussaivel da far pista, di Tscharner. En media fetschia il runal ina svieuta da circa 10’000 francs ad onn. Pli baud – cura ch’i deva dapli uffants en vischnanca – saja quai mintgatant era stà 30’000 francs per enviern.

Il 1994 è vegnì construì il nov runal

Avant 50 onns è vegnida fundada la societad cooperativa dal runal. A l’entschatta devi mo in pitschen runal, l'onn 1994 è alura vegnì construì in nov e pli lung runal. Quel ha en il fratemp survegnì in nov motor ed in nov indriz da cumond. La suprastanza da la cooperativa da runal lavura gratuitamain, dus emploiads dal runal survegnan ina paja per ura. Tar investiziuns pli grondas ha la societad ils davos onns survegnì sustegn da la vischnanca e da sponsurs privats.