Alvagni - Hotel Belfort è en novs mauns

Sco quai che Balz Homberger ha ditg envers RTR, vul el renovar l'hotel e far accessiblas las chombras a persunas en sutga cun rodas. L’immobiglia duess sco pli baud vegnir nizzegiada sco hotel cun ustaria. En l’avegnir duessi dar regularmain occurrenzas culturalas. Balz Homberger ha serrà giu la scola d'hotellaria a Lucerna ed ha gia rimnà experientscha en differents manaschis da gastronomia.

Il davos temp è l’hotel da tradiziun adina puspè vegnì en las lingias grassas. Markus Beer ch’è stà cuschinier ed ha manà l’hotel tranter ils onns 1976 – 2015, vuleva l’onn 2013 vender l’hotel cun agid da l’interpresa d’aucziuns Ricardo.

Il purschider ch’aveva gudagnà l’aucziun era ina persuna anonima che vuleva mo far ina sgnocca. E l’onn 2022 ha in’acziun cun participaziun da passa 60 persunas fatg attent sin la problematica da l’ustaria serrada: «Bavegna Gasthaus Belfort Alvaneu: Wir sind die Gäste, wo bleibt der Wirt?», è stà da leger en gronds bustabs che las persunas purtavan. Ils davos 10 onns è l’hotel adina puspè vegnì nizzegià per occurrenzas. Temporarmain è l’hotel vegnì manà da divers ustiers ch’han però betg tegnì la dira a lunga vista.