Ils ultims onns n’èsi betg adina stà alv durant ils dis da Nadal. Ma l’onn passà ed era quest onn è l’entira cuntrada enzugliada d'ina cuvrida da naiv. Per ils territoris da skis en l’entir chantun in bel regal da Nadal, surtut uss che las prognosas empermettan per ils proxims dis sulegl. Uschia di la directura dal turissem da Surses-Beiva, Tanja Amacher che talas prognosas sajan in bun argument era per persunas en la Bassa dad er vegnir spontanamain en il Grischun sur ils dis da firà. Era en autras destinaziuns turisticas sco l’Engiadina Bassa è la naiv arrivada, ma betg tanta sco spetgà. Uschia declera il directur da las pendicularas da Scuol Andri Poo che la cuntrada è alva ma els prendessan anc dapli naiv. Tscherts implants na possian els anc betg avrir. El spera perquai che la fulla sin pista na vegnia betg massa gronda. Quai perquai ch'ils giasts sajan arrivads era en l’Engiadina Bassa ed el quintia cun blera glieud sin pista.
Bunas prognosas era per ils territoris pitschens
Il territori da skis da Val Son Pieder en Surselva na po betg sa mesirar cun ils gronds territoris da skis en il chantun. Perquai sajan ins led che la naiv è vegnida ed els vegnian ad empruvar d’avrir uschè blers implants sco pussaivel, ha ditg il directur dal turissem Stefan Schmid. Ma els avessan anc sperà dapli naiv, di Schmid. Els fetschian quint cun la gronda part dals giasts suenter ils 26 da december e lura sajan las abitaziuns da vacanzas ed ils hotels occupads ora fitg bain. Cun l’atmosfera d’enviern il mument saja era da quintar che giasts dal di chattian la via fin en Val, era perquai ch’ils pretschs per in bigliet da skis dal di èn ils pli bass en l’entir chantun, declera Stefan Schmid.
Sumegliant vesa quai ora a Mustér. Fin uss n’han ins anc betg pudì avrir la gronda part da las pistas. Cun la naiv actuala quinta il directur Stefan Arnold da pudair offrir dapli pistas als giasts. Pervia dals ferms vents dals ultims dis na saja il quantum naiv betg pli uschè gronds. Ma l’atmosfera d’enviern saja qua e quai vegnia a motivar ils giasts dad ir sin pista, era tals dal Tessin, uschia saja da sperar ch’il Pass Lucmagn na restia betg ditg serrà, declera Stefan Arnold. En general pon ins pia dir che la naiv è in bel regal da Nadal per tut las destinaziuns turisticas en il chantun.
