Grischun - Aua gronda, urizis e bovas en l'entir chantun

Las bovas ed ils privels en connex cun la ferma plievgia da la fin d'emna impedeschan vinavant il traffic. Il pass Umbrail resta serrà almain fin mesemna bunura, il pass Spleia sco era la via tranter Bärenburg e Sufers restan serrads almain fin venderdi.

Mesocco ha problems cun si'aua da baiver

Suenter che la situaziun cun las auas grondas sa calma adina pli fitg datti problems cun l'aua da baiver. En la regiun da Mesocco fin San Bernardino è l'aua da baiver tschuffragnada tenor Alert-swiss. Tal'aua pon ins sulettamain baiver u duvrar en cuschina cun stgaudar quella sin 100 grads. Pliras vischnancas tessinaisas han il medem problem.

Nagina scola a Schluein

La sonda è ina bova vegnida giu en la val da Schluein. Sco mesira preventiva ha la vischnanca perquai laschà serrà la scola il glindesdi. Plinavant han pliras persunas stuì bandunar lur chasas, han dentant puspè dastgà turnar a chasa glindesdi saira.

A Sumvitg hai dà donns vi da differents auals, vias d'alp e punts da viagiar. Il president communal Patrick Schaniel ha ditg ch'ils dus auals tranter Valens e Pardomat hajan gì aua gronda. A Glion han ils pumpiers pudì spendrar pievels d'avieuls dal Glogn ch'è ì sur las rivas. Gia la fin d'emna ha ina bova stuppà in rempar sur Trun .

La plievgia en Surselva tschessa dentant plaunsieu, il mardi saja anc da quintar cun 5 fin 20 millimeters plievgia.

L'En è sa quietà

Glindesdi ha per part valì il stgalim da privel 4 (da 5) per l'En, uss è il privel tenor SRF Meteo anc sin stgalim dus. Er auters auals han manà blera aua.

En la regiun La Plaiv han ils pumpiers pumpà ora tschalers e lavurers e lavureras da vischnanca èn stadas l'entira notg sin girs da controlla. Er en la vischnanca La Punt Chamues-ch èn ils pumpiers e las pumpieras stadas en acziun. Els ed ellas han pumpà l'aua or da la garascha da l'hotel Curuna. Ed igl haja dà diversas bovas en las vals lateralas, ha il chanzlist da la vischnanca Urs Niederegger ditg.

A Zuoz è ina bova vegnida a val fin sin la plazza da golf, la plazza resta dentant averta sco il mainagestiun Ramun Ratti ha ditg. Auter che la bova sin la plazza da golf n'haja betg dà ulteriurs donns pli gronds, di il chanzlist da la vischnanca Zuoz Patrick Steger. Plinavant è enconuschent che l'En ha stgarpà cun la punt da l'hotel Kronenhof a Puntraschigna ed ha per part inundà il campadi a Sur En.

Tenor la meteorologa Regula Keller sa calma la situaziun d'aura er en l'Engiadina. En vista a la fin d'emna avessan temperaturas agreablas da turnar.

Malauras en il Grischun

Grischun central

Er il Grischun central è stà pertutgà fermamain da malauras:

• Ina part dal cuntegn dal lai da fermada da Sufers è vegnida svidada pervia dal privel da vegnir emplenì si.
• L'A13 ad Andeer è vegnida protegida cun satgets da sablun.
• Casti è stà senza forz'electrica da bun'ura, ina staziun da trafo è vegnida inundada. Pliras vias èn stadas serradas, uschia è per exempel Farera betg stà cuntanschibel per pliras uras.
• Dumengia è il vitg e la via tranter Ziràn ed Andeer vegnids protegids da l'aual Ruinal cun satgs da sablun.
• A Brinzauls è dapli crappa crudada pervia da la plievgia.

Aua gronda sumeglianta a quella dal 2002

Cun consequenzas pervi da la plievgia intensiva dals ultims dis, hajan ins en spezial quintà en la Surselva ed en la Valragn. Pli pauc sin il radar saja stada l'Engiadina, ha ditg envers RTR Urban Maissen, il manader da l'Uffizi da guaud e privels da natira.

Medemamain per il Rain sco er per l'En ha la Confederaziun avertì dal privel d'innundaziuns. Il Rain a Panaduz ha manà gia dumengia saira circa otg giadas uschè blera aua sco da las medemas uras avant in'emna ed a Haldenstein è il ivel dal Rain stà circa quatter meters pli aut ch'avant in'emna.

Prognosas d'aura

Er sch'i cuntinuescha da plover duai la fermezza tschessar. Igl è dentant da quintar cun ulteriurs 30 fin 70 millimeters plievgia en il Grischun, di Meteorolog Felix Blumer a SRF. Positiv èn las temperaturas pli bassas, il cunfin da naiv sa sbassà ed i dat pia dapli naiv e main plievgia che culla en ils flums ed ils auals.

La fin d'emna

Sonda saira era la via tar Stampa en Bregaglia serrada pervi da plantas e crappa sin via. Er tranter Tschierv e Fuldera hai dà impediments dal trafic pervi da lavurs da rumida suenter ina bova. La via en Lumnezia-sut tranter Glion e Peiden Bogn è er stada serrada temporarmain perquai ch'il Glogn è ì surora.