La regenza grischuna vul promover a moda persistenta l'energia solara. Capitar duai quai en la segunda etappa dal uschenumnà «Green Deal». Quai è la resposta da la regenza sin ina incumbensa lantschada dal deputà social-democratic Lukas Horrer. Quella pretenda che la regenza elavuria ina strategia per ina offensiva solara en il Grischun. Quai cun mesiras concretas ed in plan da temp e finanziaziun.
En il rom dal «Green Deal» vul la regenza ussa laschar examinar tge impuls finanzials ch'il chantun pudess metter per promover però era per simplifitgar la lubientscha per implants solars. Il Cussegl grond decida en ina da las proximas sessiuns sch'el vuless surdar l'incumbensa a la regenza u betg.
Per l'emprima etappa dal «Green Deal» ha il Cussegl grond concedì l'onn passà 68 milliuns francs – fin 2050 vai perfin per 1,8 milliardas francs. Finamira è da cuntanscher sin il 2050 netto nulla emissiuns da CO2. En il Grischun vegn actualmain producì 1% dal current cun energia solara.