Sin tetgs e vid fatschadas da chasas saja quai pussibel da producir dapli electricitad che quai che Svizras e Svizzers dovran da preschent. Quai ha ditg l'associaziun professiunala Swisssolar. L'onn 2050 duai vegnir producì 15 giadas dapli electricitad cun implants da fotovoltaica che ozendi, uschia lur pretensiun. Che questa midada gartegia, ha preschentà Swiss-solar differentas mesiras. Tranter auter dumonda ella ch'ils chantuns introduceschian in obligatori da nizzegiar tetgs e fatschadas d'edifizis novs e sanads. Latiers duai la Svizra era sa participar a la reconstrucziun da l'industria solara europeica.
Las finamiras ch'il Cussegl federal ha tegnì ferm en la missiva tar la lescha federala per il provediment d'energia segir sajan fixadas memia bass. Cun quellas finamiras na possian ins, tenor Swisssolar, betg cuntanscher la finamira netto-null enfin il 2050.
Ord l'archiv
Ina chasa d'ina famiglia a Vuorz producescha otg giadas dapli energia che quai ch'ella dovra sezza. Perquai è in record mundial e perquai è la chasa vegnida onurada cun in premi. RTR ha rapportà da la chasa da Ursula Babst Brunner ed Arnold Brunner.