Suenter l'eclat discriminant da l'enviern 2023 ha ina gruppa da lavur uss preschentà 10 differentas mesiras che duain mitigiar ils conflicts e problems ch'i dettia adina puspè a Tavau cun giedieus ortodox. La gruppa da lavur – ch'è vegnida incumbensada da chattar soluziuns per la covivenza – sa cumpona da represchentants da l'organisaziun turistica da Tavau, da la vischnanca da Tavau e da la Federaziun svizra da las communitads israelitas. Ella è vegnida creada suenter che l'organisaziun turistica da Tavau aveva terminà l'avust 2023 il project d'intermediaturs – ina collavuraziun cun la federaziun giudaica. Tenor Reto Branschi – secretari general da l'organisaziun turistica da Tavau – n'haja lez sistem numnadamain betg funcziunà.
Uss n'è il project d'intermediaziun cun ils giasts gidieus a Tavau dentant betg pli terminà, ma schizunt vegnì engrondì. Per questa stad èn tenor la communicaziun da la gruppa anc dapli intermediaturas ed intermediaturs gidieus engaschads a Tavau. Els enconuschan bain la moda da viver dals gidieus ortodox.
Eclat l'enviern passà
Il favrer passà è in cas da discriminaziun da gidieus ortodoxs a Tavau ì per tut il mund enturn. Il fittadin d'in restaurant en la regiun da skis aveva infurmà davant ses restaurant, che giasts gidieus na possian betg pli prender a fit scarsolas u gianellas.
Pervi da divers incidents displaschaivels – tranter auter l'enguladitsch d'ina scarsola – na fittain naginas scarsolas pli a giasts gidieus.
Quai ha chaschunà gronda critica. Ma gia la stad passada avev'il sa cuntegnair da giasts gidieus procurà per grondas tensiuns a Tavau. Branschi aveva crititgà fermamain il cumportament dals giasts ed accentuà ch'il project d'intermediaturas e d'intermediaturs avess atgnamain gì sco finamira d'evitar tals conflicts.
Or da l'archiv:
