Pia, èn els ed ellas insumma anc bainvegnids en la destinaziun da vacanzas? Nus avain dumandà persunas sin via. Durant che bleras scolas en la Bassa han vacanzas da sport è Tavau plain e sin la Promenada entaupan ins blera glieud. Dentant vesan ins paucs giasts giudaics, quests n'hajan actualmain nagins dis da festa.
Tut diversas opiniuns
In giuven indigen manegia ch'i na saja betg en urden d’excluder in'entira gruppa da persunas, mo pertge ch'ina part da quels ha fatg insatge.
Jau crai che tuts han gia fatg diversas experientschas cun giasts, betg mo cun ils gidieus ortodox. Tavau è in lieu da turissem nua che diversas persunas arrivan e nua ch'i po dar conflicts.
In pèrin pli vegl haja era discutà sur dals giasts ortodox. Els èn da Turitg ed arrivan a Tavau per far vacanzas. Tenor ils dus na sajan ils gidieus betg bainvegnids.
Igl è grev da metter tuts en il medem satg, dentant avain nus era fatg experientschas ch'agitan. Per exempel da stad laschan els enavos il rument enturn il lai ed els n'han nagin respect envers nus.
Jau sun stada a far cumpras ed hai spetgà in’ura, cun quai che quests sa smatgan tranteren. Tenor mai n'hai da far nagut cun la religiun, mabain ch’els na dattan nagin resguard.
En ina mazlaria indigena n'han els da far pauc cun ils giasts giudaics, cun quai ch’els na porschan betg la charn che quests giasts mangian. Dentant vesan u audan els tge che marscha en il vitg.
Els crodan en egl sin via, dentant betg negativ u positiv. Simplamain auter, sco intginas autras persunas era.
Tras quai ch’ins auda adina puspè da cas, pens jau che quai influenzescha l’opiniun da persunas neutralas.
In um indigen manegia che tut las persunas èn bainvegnidas a Tavau. Tenor el ston els dentant s'adattar in zic.
Per part han els fadia da sa tegnair vi da nossas reglas. Sche nus giain en vacanzas, per exempel in Tirchia, stuain nus era sa depurtar sco quels là.
E per in pèrin giuven ch’è per in pèr dis en vacanzas a Tavau è la situaziun absurda.
Nus n'avain en general nagins problems cun autras religiuns. Impurtant è ch’ins na hassegia nagin auter e ch’ins laschia viver ils auters.
Vacanzas a Tavau
Tut tenor stagiun sajan tranter 500 fin 4’000 gidieus en vacanzas a Tavau. Era sch'igl ha dà plirs da quests schabetgs cunter ils gidieus ortodox, vegnan els er en futur anc en vacanzas, cunquai che l’infrastructura saja dada. En pli na san els bleras giadas gnanc da quests cas cunquai ch’els na legian betg talas medias. En pli grondas stizuns datti products ch’èn koschers. Surtut durant il fanadur ed avust crescha il sortiment koscher.
