Il contract per fusiunar la vischnanca da Tschiertschen-Praden cun la citad da Cuira è pront per la votaziun. Avant passa in onn hajan ils dus lieus laschà examinar ina fusiun, communitgescha la citad da Cuira. Uss ha la gruppa da project ensemen cun cussegliaders externs preschentà ils resultats da l'examinaziun e tractativas per ina situaziun da partenza.
Tranter auter saja sa mussà che Tschiertschen-Praden saja en ina sauna situaziun finanziala. Ina fusiun eventuala chaschunass tranter auter er custs da gestiun pli auts, per quai prevesa il chantun da sustegnair la fusiun cun 7,25 milliuns francs, e da plinavant contribuir durant 10 onns mintgamai almain 350'000 francs.
Ils 14 da zercladur decida la radunanza communala da Tschiertschen-Praden. Tar in Gea po la populaziun da Cuira s'exprimer la fin da settember.
Cuira crescha anc ina giada
La fusiun cun Tschiertschen-Praden fiss per Cuira gia la terza durant ils davos onns. Sin l'entschatta 2020 è la fusiun cun Maladers ida en vigur, in onn pli tard ha er Haldenstein fatg part da la vischnanca da Cuira. Uschia è il dumber d'abitants da Cuira creschì mintgamai per bun 500 e passa 1'000 persunas.
Sche er Tschiertschen-Praden fa a partir dal 2025 part da las vischnancas fusiunadas cun Cuira creschiss la chapitala grischuna anc ina giada per radund 300 persunas – uschia ch'il dumber d'abitantas ed abitants da Cuira surpassa la marca da 41'000 persunas.
