Las autoritads grischunas han gì tort cura ch'ellas han scumandà da duvrar la via chantunala tranter Küblis e Claustra per ina demonstraziun durant il WEF da l’onn passà. Concret èsi ì per la demonstraziun «gita d’enviern per la giustia da clima». Sco quai ch'il Tribunal federal scriva, avessan las autoritads pudì dar liber almain tscherts tschancuns da la via per la demo. Cun sia decisiun ha il Tribunal federal approvà il recurs da l’organisatur da la demonstraziun.
Dretgira grischuna aveva refusà recurs
La Dretgira administrativa dal Grischun aveva avant refusà il recurs da l'organisaziun Strike WEF. I saja stà correct da bandischar il marsch dals adversaris dal WEF sin ina senda da viandar tranter Küblis e Claustra. L'organisaziun aveva reclamà perquai ch'il chantun n'aveva betg lubì da manar il marsch sin quest traject sur la via chantunala. Tenor la dretgira n'ha il scumond betg impedì la libertad d'exprimer l'opiniun e da sa radunar. Ils organisaturs dal marsch da protest cunter il WEF avevan sin quai ponderà da sa drizzar al Tribunal federal ed alura era fatg quai.
La raschun daco ch'il chantun aveva scumandà il marsch sin quest traject saja stà perquai che questa via avess servì sco axa da salvament per ils vitgs en il conturn perquai che la via chantunala è entras il WEF stada fermamain frequentada. Dentant na saja il collectiv dal «Strike WEF» betg stada persvadida da questa argumentaziun ed haja sinaquai inoltrà recurs tar la Dretgira administrativa dal Grischun.
