L’intelligenza artifiziala è in tema permanent en il mintgadi, ed i dat massa events ed infurmaziuns. Ina en pli vul far ina gruppa cun persunas dal turissem, da la medischina, dals affars d’intelligenza artifiziala, da scolas ed universitads. La finamira è da realisar in forum cun il num «Alpine Tech Summit» a Tavau l’onn 2026. Gia durant il WEF a Tavau datti blers lieus nua che l’intelligenza artifiziala vegn discutada. Surtut a l'ur dal WEF datti numerus posts ed events davart quai.
Tenor il manader da la destinaziun Tavau Claustra Albert Kruker pudess ins prender ensemen tut questas persunas ed affars interessads e far in agen forum. Uschia vegniss Tavau distgargià durant il WEF, cun quai che tut questas persunas ed affars vegnissan pir la primavaira al Alpine Tech Summit. L’emprima ediziun duai avair lieu il 2026. Actualmain na saja la finanziaziun anc betg sclerida dal tut. Il chantun haja ditg da sclerir il project e lura sustegnair. E cun auters partenaris da l’economia sajan els en contact.
-
Bild 1 von 2Legenda: A Tavau han ils involvids suttascritt la decleraziun d'intenziun. RTR -
Bild 2 von 2Legenda: Survart: Gian-Paolo Curcio (FHGR), Alexander Ilic (ETH), Rebecca Brauchli (ZHAW), Patrick Marti (White Lens), Nadja Fleischli (regiun Partenz/Tavau) Sutvart: Albert Kruker (destinaziun Tavau/Claustra), Gion Sialm (FHGR), Benjamin Grewe (ETH), Janette Wiget (AI House Davos), Valérie Favre Accola (vischnanca Tavau), Thilo Stadelmann (ZHAW). RTR
In ulteriur forum sco tut ils auters?
Patrick Marti, il schef da White Lens vul purtar en in nov aspect en quest forum. La segirezza da datas e surtut era la segirezza d’uffants na vegn en autras discussiuns da l’intelligenza artifiziala savens betg fatga. Per el è quest aspect dentant impurtant.
En quest mument che nus discurrin ensemen sa chattan 2,5 milliuns pedofils e pedocriminals en la rait che attatgan ils uffants. Surtut en l’Europa e l'America dal Nord – dentant era sur tut il globus.
Concret discurra Patrick Marti da fotografias da parts intimas u mobing che uffants e giuvenils sut 18 onns survegnan u tramettan sur il telefonin. El è vi da programmar ina software che duai sustegnair la segirezza d’uffants. El prenda part per far questa discussiun. Mintga persuna u affar che fa il medem porta en in auter aspect – e quests temas specifics duessan esser il motiv che quest ulteriur event da l’intelligenza artifiziala fa senn.
Adattà al tema