Il start-up chinais Deepseek è dà en egl cun ses nov model da la IA Deepseek R1. Quest model da lingua sa basa sin emprender cun maschinas ed è disponibel sco software open source. Quai vul dir ch'el po vegnir consultà ed utilisà da mintgin. Deepseek ha la finamira da midar fundamentalmain la moda e maniera co ch' infurmaziuns vegnan tschertgadas e chattadas en l'internet. Experts èn da l'avis che Deepseek R1 possia concurrenzar cun ils models dad intelligenza artifiziala dominants da las interpresas sco OpenAI, Google e Microsoft. Il model è spert sa mess a la testa da las rangaziuns da downloads ed è disponibel gratuitamain.
Trenà cun datas ed infurmaziuns publicas
Deepseek R1 funcziuna sumegliant sco il chat-bot ChatGPT ed è vegnì trenà cun ina gronda quantitad da funtaunas, tranter auter cun paginas d'internet publicas sco era bancas da datas scientificas ed archivs che na vegnan savens betg registrads da maschinas da retschertga tradiziunalas. Deepseek na tschetga betg be ils chavazzins sco tals, ma chapescha er l’intenziun da las utilisadras e dals utilisaders. Ultra da quai analisescha il model il cumportament dals utilisaders per pudair furnir resultats precis e persunalisads cun mintga ulteriura retschertga. E l'intelligenza artifiziala lavura cun datas da temp real e po era duvrar ils cuntegns ils pli novs per sias respostas.
Progress gratuit – ed enorm impurtant
Deepseek vegn d'intgins experts recepì sco progress impurtant en il sectur da las maschinas da retschertga, perquai ch'el po vegnir utilisà a moda multifara e simpla en auters programs. Questa tecnologia è tant favuraivla sco er effizienta. Tuttina ha Deepseek, sco auters models da lingua IA, il problem da «halluzinaziun» nua ch'ella dat respostas faussas u inventa ils fatgs.
Cun custs da svilup da be 5,6 milliuns dollars è Deepseek ina concurrenza per gronds concerns da tecnologia sco OpenAI e Meta, che dattan ora summas bler pli grondas e che occupan numerusas spezialistas e spezialists. Sco alternativa gratuita metta Deepseek en dumonda il model da fatschenta da questas interpresas etablidas.