La regulaziun dad IA da l’Uniun europeica è ina lescha che metta si reglas generalas per IA. Tranter auter prevesa quella per exempel in scumond da sistems che sa basan sin intelligenza artifiziala nua che dretgs fundamentals èn pertutgads.
Per Elisabeth Ehrensperger, la scheffa da TA swiss, l'organisaziun che perscrutescha las consequenzas da tecnologias per la Svizra, na fiss la regulaziun sco quella che l’Uniun europeica ha betg la meglra via per la Svizra. Ella vesa plitost ina regulaziun da sectur a sectur. Cun quai che IA saja ina tecnologia da basa che vegnia duvrada en divers lieus sco per exempel en la medischina, en scola u tar la persecuziun penala dettia da sectur a sectur differentas ristgas, di Ehrensperger.
Differents lieus cun differents aspects e differents ristgs dovran probablamain ina regulaziun da sectur a sectur.
Elisabeth Ehrensperger è politologa. Ella ha studegià istorgia, scienzas politicas e medias a l'Universitad da Berna. Ella maina la fundaziun TA-Swiss, che perscrutescha las consequenzas da tecnologias.
Valitaziun da ristg
In auter punct che saja impurtant da resguardar è ina valitaziun da ristgs. Ina tala ha era l’Uniun europeica. Uschia duain ils differents sistems vegnir classifitgads tut tenor quants ristgs ch'els portan cun sai. Quai saja plitost impurtant là nua ch'i vegnia decidì davart persunas. Uschia ha l’UE decidì da scumandar sistems en la perscrutaziun penala ch'enconuschan persunas, perquai ch'ils ristgs èn memia gronds.
Era sche l’intelligenza artifiziala è globala di Elisabeth Ehrensperger ch'i saja impurtant d'era regular sin nivel naziunal co ch’ins veglia ir enturn cun la tecnologia.
Mintga pajais sto decider tge ch'è impurtant e tge societad ch’ins vul esser. Sch’ins piglia per exempel la tecnologia da la reconuschientscha da las fatschas saja da metter visavi la segirezza a la libertad. E quai na valitescha betg mintga pajais tuttina.
IA - tema a l'ur en il parlament
Il svilup da l'intelligenza artifiziala è rasant. Quel è pli svelt che la legislativa. In punct che saja gnanc uschè fauss, di il cusseglier naziunal da la Partida populara svizra Franz Grüter. Per el èsi en emprima lingia impurtant da betg franar l’innovaziun tras memia blera regulaziun.
Innovaziun avant regulaziun.
El è in dals paucs politichers a Berna che s’occupa pli intensiv da l’intelligenza artifiziala. Grüter ha sez fundà ina firma d’informatica e sesa oz en il cussegl administrativ d’ina firma che fabritga il mument in center da datas. Ins stoppia betg pensar che la Svizra saja il proxim Silicon Valley di Grüter, dentant stoppian ins sustegnair la Svizra en ils secturs nua ch'ella saja ferma, per exempel cun centers da datas nua che las datas da l’intelligenza artifiziala pon vegnir arcunadas. La segirezza en il pajais saja impurtanta per tals centers e quella porschia la Svizra.
In auter parlamentari che ha fundà ina firma d’informatica e sesa uss en il cussegl d’administraziun da quella è Gerhard Andrey. El politisescha per la Partida verda. Per el èsi impurtant ch'ins sclerescha la situaziun da dretg per las firmas en Svizra. Quellas duain savair tge ch'ins possia e tge betg.
Per mai èsi impurtant che nus stgaffin segirezza giuridica per firmas.
Quai na vul però betg dir ch’ins duai regular spert l’IA, di Andrey. Ins duai simplamain ina giada metter sin maisa co che la situaziun saja il mument ed a maun da quai guardar co e tge che fiss il meglier per regular.
Era Elisabeth Ehrensperger vul ch’ins lascha temp per far ina lescha – pli gugent ina buna ch'ina a la svelta. Dentant fissi tenor ella meglier d'avair plitost oz che damaun respostas.
Confederaziun vi da analisar
Il Cussegl federal aveva il december 2023 dà l'incumbensa a l'Uffizi federal da communicaziun da far in'analisa davart la regulaziun dad IA. L'analisa duai vegnir publitgada la fin dal 2024. Tut tenor resulta or da quest'analisa ina regulaziun per la Svizra.