Dapi l'entschatta da l'onn han intgins forsa remplazzà la pausa sin canapé cun ina visita en il center da fitness. Quai constatescha era Marcel Niederer, il vicemanader dal Fitnesstower Medical a Cuira. A l'entschatta da l'onn visitan bler dapli persunas il center da fitness. Durant quest temp vendan els er dapli abunaments ch'uschiglio.
Durant il schaner ed il favrer vendain nus ils pli blers abunaments da fitness.
Sco quai che Marcel Niederer di, han ils propiests per l'onn nov ina gronda influenza sin il dumber da visitaders durant il schaner e favrer. Il cumenzament sportiv en l'onn nov fetschia bain al corp ed al chau. I dovra dentant la dretga tenuta, motivaziun e perseveranza, sco l'expert da sport menziuna.
Tar nus vegnan las principiantas ed ils principiants accumpagnads e mintga pèr emnas han lieu discurs e controllas.
Tenor Marcel Niederer fetschia l'entschatta er senn da sviluppar ensemen cun in coach in plan da trenament. Quel dettia in pau segirtad ed orientaziun durant ils exercizis da moviment. In tal plan vegn adina adattà a la persuna ed a sias finamiras. Insatgi che vul bajegiar si musculs trenescha auter ch'insatgi che vul lavurar vi da la cundiziun.
Per quels che han entschet pir avant curt cun il sport dat l'expert anc sin via in bun cussegl:
Ins duess cumenzar plaun a plaun ed augmentar cun il temp. Il trenament duess er esser varià ed il plaschair duess adina star en il center.
