Entschet ha la dunna da 29 onns cun crossfit. Quai è in program intensiv da forza e cundiziun en cumbinaziun da differents sports. Gia lura ha ella percurschì ch'ella ha dapli forza che autras. Tar in exercizi ha ella auzà 150 kilos, e sequent ha ella lura chattà il sport da powerlifting – pia l'auzar uschè autas paisas sco pussibel. Oz, 4 onns pli tard, è Gina Berther gia per la terza giada campiunessa svizra, e dapi il zercladur era campiunessa mundiala.
Almain tschintg giadas ad emna en il fitness
Powerlifting pon ins far sin trais modas: auzar giu dal banc, ir en la schanuglia u auzar sur crusch. Ed en l'exercizi d'auzar sur crusch ha ella dumagnà 195 kilos, ed è uschia la meglra dal mund en sia categoria da paisa.
Per cuntanscher quest success passenta la Tuatschina bler temp en il fitness. Tschintg giadas ad emna per almain duas uras trenescha ella ensemen cun ses coach. Dasperas lavura ella en ina stizun d'artitgels da sport.
Mes amis e mia famiglia san ch’jau trenesch mintga saira da glindesdi fin venderdi. Ma nus avain tuttina avunda temp per sa vesair u telefonar.
Damai ch'il powerlifting è anc plitost in sport da nischa, na vegn Gina Berther era betg celebrada uschè fitg sco autras campiunessas mundialas. Quai na disturba dentant betg ella. Per ella saja la via tar il success il pli impurtant. Il titel saja be «la tscharescha sin la turta».
Il nutriment
Per ch'ils musculs creschan ed era la forza n'è dentant betg mo il trenament necessari, mabain era il nutriment. Impurtant saja d'avair avunda proteins. Perquai mangia ella blera charn, pesch e legums. Dasperas datti ils idrats carbonics, per exempel en furma da ris u pasta.
Jau na quintel naginas calorias.
Quai na munta dentant betg ch'ella po mangiar exact tge ch'ella vul. Pizza u tschigulatta datti bain mintgatant, dentant cun mesira. Tuttina, desister cumplettamain na vuless ella betg. Sin il pli cura ch’ella sa prepara intensivamain sin in campiunadi, lura sto la tschigulatta restar en frestgera u il meglier gist en stizun.
Stuì emprender da cuschinar
Malgrà che Gina Berther sa ussa exact tge nutriment che fa bain ad ella, n'è quella savida betg stada qua davent da l'entschatta. Ella ha stuì emprender co cuschinar simpel, ma tuttina bain. Ella ha guardà differents recepts u era dumandà per tips a ses collegas che fan medemamain bler sport.
Ideal da bellezza
Sch'ins pensa vid ina dunna na vegnan sco emprim betg gist ils musculs endament. Quels dovri dentant per pudair auzar uschè grondas paisas sco quai che Gina Berther fa. Uschia tutgan ils musculs tar ella sco quai ch’era il sport da powerlifting tutga tar ella. Sia postura sportiva e musculusa ha dentant era gia procurà per remartgas nunadattadas:
Jau hai era gì umens che han ditg a mai ch'jau guardia ora pli fitg sco in um che sco ina dunna. Quai ha fatg mal a mai.
Cun il temp ha la dunna ch'abitescha dapi 12 onns en il Vallais emprendì co ir enturn cun opiniuns diversas. Ella haja gugent ses musculs e mussia era gugent els. Ed els sajan il mussament che ses corp haja gia cuntanschì ina massa. E da quai saja ella loscha.
