Il territori da Breil/Vuorz/Andiast è in mesaun grond cun sias sis sutgeras e runals. 40 kilometers pista datti però e la mesadad da quellas pon vegnir ennavadas. Cunzunt per las pistas che van giu a val è quai impurtant, pertge uschia po il territori da skis, cun exposiziun principala vers sid, tuttina garantir l'ir cun skis gia baud ed era tard la stagiun.
Per far questa lavur ston ils lavurants colliar ils chanuns cun ils cabels da communicaziun, cun las lingias d'aua e cun la forza electrica. Nus accumpagnain Daniel Friberg, el è tranter auter responsabel per l'ennavaziun en il territori da Breil. Bler capita ozendi digitalmain: per l'ina sto Daniel Friberg actualisar la nova posiziun dal chanun. Ed apaina che quai è fatg, po el dar il culp da partenza per la producziun da naiv via app:
Uss è il chanun pront per far naiv.
Be cun l'installaziun dal chanun è la lavur però betg fatga. I vala tuttina dad adina puspè controllar la producziun, schebain digitalmain ma era al lieu. Uschia ston ils collavuraturs tecnics ir sperasvi mintga per uras e deliberar ils chanuns da naiv u da glatsch che po tatgar vid ils apparats ed evitar ina producziun senza incaps.
Temperaturas d'enturn -3,5 grads, uschè bassa umiditad da l'aria sco pussaivel e pauc vent èn ils facturs da success per far la naiv. Èn quels facturs dads, lura pon ils chanuns e las lantschas dar tut – e lura giran els uschè ditg che las cundiziuns na sa midan betg puspè. Pia en il cas ideal: 24 uras il di.
Il mument funcziuna tut bain. Las temperaturas pudessan dentant anc vegnir in zic pli fraidas. Ma per l'emna che vegn vesi ora bain.
Ils chanuns èn dentant installads, las colliaziuns tecnicas funcziunan era tuttas – quai vesa Daniel Friberg sin il visur en la centrala. Suenter in servetsch da dudesch uras va la lavur a fin per el e ses collegas surpiglian il proxim servetsch. Quels van adina da las 7:00 – 19:00 e da las 19:00 – 7:00. Tut quai, per garantir bellas pistas l'enviern.
Or da l'archiv:
