Ils trais dis da la Festa da Cuira han carmalà 85'000 persunas sin las vias ed en las gassas da la citad. Ed ils organisaturs sa legran che las visitadras ed ils visitaders an cumprà var in terz dapli bindels, sco contribuziun voluntaria. Els speran dentant che la chapientscha per questa contribuziun creschia anc. Era per quai che pertutga il deposit per buttiglias da pet e stgatlas da bavronda vesa il comité d'organisaziun anc potenzial.
Plinavant ha la polizia da Cuira dumbrà 29 intervenziuns, tranter auter per dar agid e pervi d'acts da violenza. La sanitad a tractà en tut 93 persunas.
Sin l'entir areal da la festa da Cuira hai dà la pussaivladad da mangiar. Spaisas grischunas sco capuns e maluns hai dà per exempel en la halla da la chasa municipala. Cuschina asiatica han ins pudì mangiar tar la chasa d'art u era sut da la via da posta. Era rauba dultscha n'è betg vegnida a la curta: creps e tatsch da maila hai dà tar la chasa d'art, soft ice e vatta da zutger en la halla da la chasa municipala. Ils classichers sco hot dogs, hamburgers, pommes frites u era liongias dal gril eran sparpagliads sur tut l'areal da la festa da Cuira.
Durant tut ils trais dis hai er dà concerts cun musica live da bands, artists solo, furmaziuns da musica mabain era concerts cun DJ's che han procurà per buna atmosfera. Ils differents artists han sunà sin dapli che 20 differents palcs e plazzas. Sco emprima sin la tribuna dal «Stadtpark» è stada Carmen Cresta che fa blues Grischun.
