Gia ils emprims meters da nossa patruglia sa mussa: Virginia Ritter ha in egl sco in girun cun ir tras las vias e giassas da Cuira durant la festa da la citad. Nua ch'jau ves carussels ed uffants che givlan dal plaschair, vesa ella uffants pitschens che han en la massa da glieud pers ils geniturs. Nua ch'jau ves grils cun liongias gustusas, vesa ella privel da fieu. Nua ch'jau ves persunas en luna da festa che fan viva, vesa ella natels sin maisa che pon vegnir engulads, tastgas da maun mez avertas, promils memia auts che chaschunan dispitas ubain er gervosas sin las maisas nua ch'ins pudess derscher en insatge. Dapi 6 onns è Virginia Ritter policista e durant la festa da la citad ha ella savens da far cun tals delicts.
Preparada per tut las situaziuns
La policista è preparada per quasi tut. Vid l'unifurma che paisa ver 10 kilos èn vonns da gumma, pistola, spray da paiver, taser, chanvettas e natiralmain la vesta. Ins na sa numnadamain propi mai tge che spetga ins a la festa da Cuira: «Gist ier avain nus vesì in um cun ina spada», raquinta ella. Tar talas persunas èsi da sclerir tge ch'ella fa cun l'utensil che po esser malsegir. L'um era gist stà ad ina festa dal temp medieval e n'aveva nagut per metter en la spada.
Durant nossa patruglia ha Virginia Ritter dentant betg duvrà las chaussas vi da sia vesta – igl è restà ruassaivel. Dentant sco quai è savens: Pli tard ch'i vegn e pli blers delicts ch'i dat.