Radund 90'000 persunas han visità questa fin d'emna la festa da la citad da Cuira. Sco quai ch'ils organisaturs scrivan en ina communicaziun saja la festa stada in success, era grazia als bels dis da stad. Ma era grazia a la maschaida reussida da tradiziun ed innovaziun. Tranter auter avevan ils organisaturs da la festa da Cuira optimà il concept da recicladi. Quel saja vegnì sustegnì a moda grondiusa dals visitaders. Quest engaschi mussia che far festa e proteger l'ambient possian ir maun en maun. Plinavant haja haja dà passa 100 concerts sin differentas tribunas da la citad.
Era la polizia da la citad da Cuira guarda enavos sin ina festa paschaivla. En tut haja dà 44 intervenziuns, da quels sajan stads 13 en relaziun directa cun la festa da Cuira. Tranter auter èsi ì per acts da violenza, agid, enguladitschs u memia aut consum d'alcohol. Il salvament da Cuira ha ensemen cun l'uniun da samaritans tgirà en tut 107 persunas – cunzunt tagls, sgrifladas u vaschias. 10 persunas hajan gì mal il tgau e tar 11 hajan ins constatà in memia aut consum d'alcohol u da drogas. Il salvament da Cuira ha transferì totalmain tschintg persunas a l'ospital chantunal dal Grischun.
Sper la festa da Cuira èn anc pliras autras occurrenzas da festa stadas sin il program da la fin d'emna. La Street Parade a Turitg, il Rock Sedrun ni era il Städtlifest a Glion. Per ils organisaturs da la festa da Cuira n'è quai dentant betg stà in problem. La data da la festa da Cuira saja tradiziun. Adina l'ultima fin d'emna da las vacanzas da stad è reservada per la festa. Las autras occurrenzas pon era esser in avantatg per la festa da Cuira. Suenter la Street Parade turnian ils giasts puspè en Grischun – e veglian far festa a Cuira e betg a Turitg.
La data da la festa da Cuira è tradiziun – e quella na vulain nus betg midar.
Uniuns – dapli interessents che plazs
Mintg'onn viva la festa da Cuira da las var 40 uniuns che han lur stans en la citad veglia da Cuira. Là porschan quellas divertiment, da mangiar e bavrondas. Per dapli n'haja betg plaz, era sch'ils organisaturs purschessan gugent a dapli uniuns in stan. Dentant exista almain ina glista da spetga per las uniuns che n'han survegnì nagin stan. Mintg'onn dettia numnadamain uniuns che sa retiran – ed uschia possian uniuns da la glista da spetga surpigliar il stan.
In lieu che n'ha quest onn gì nagin stan cun ina uniun, è il Hegisplatz a l'ur da la citad veglia. Quai era adina la plazza cun in'uniun da cultura. Per quest onn n'han ils organisaturs dentant chattà nagin'uniun che vuleva porscher insatge cultural.
Nus sperain da chattar per l'onn proxim ina nova uniun da cultura per il Hegisplatz.
Era l'EHC Cuira fa part al «Churer Fest»
Il club da hockey da Cuira ha in grond stan a la festa da Cuira. Quel chattan ins sin la plazza da l'Arcas en la citad veglia. Là porscha il club ina tribuna per concerts da var 30 acts ed ina gronda bar. Era per il bainstar culinaric da las visitadras e dals visitaders procura il stab dal club. RTR ha avant la festa visità l'EHC Cuira durant las lavurs preperativas e dumandà Mirco Oswald – responsabel per l'organisaziun – co las preparaziuns s'avanzan e tge speranzas ch'el ha per il «Churer Fest».
