En las ultimas trais emnas hai dà sin l'Alp Plazèr en la Val S-charl quatter attatgas dal luf sin nursas. Uschia èn vegnidas stgarpadas otg nursas, sis feridas e trais èn sparidas. Ussa ha il chau d'alp Martin Keller decidì ensemen cun ils purs da finir la stagiun d'alp per las nursas per evitar ulteriurs stgarps.
Els avevan gì la speranza ch'il luf va vinavant sch’els tegnan las muntaneras en saivs, dentant n’ha era quai betg gidà – i ha puspè dà attatgas sin nursas. Da tegnair ils animals en saivs ha dà dapli lavur per ils pasturs ed igl è er sa derasada ina malsogna en la muntanera.
Perquai che nus avain tegnì las nursas en saivs èn las infecziuns da malsognas s'augmentadas – e quai è in stress per il persunal e per ils animals.
Uschia han els gia mesemna bun'ura stgargià las nursas da l’alp. Las vatgas restan anc sin l'alp. Dad organisar il transport in mais pli baud haja funcziunà detg spert, dentant stoppian ils purs reorganisar lur plans: Perquai che las nursas vegnan in mais pli adura a chasa ston els uss avair pavel per ellas e na pon betg rimnar anc dapli fain per l’enviern. Uschia pudessi vegnir quest enviern stretg cun pavel ed intgins purs ston forsa cumprar vers la fin da l’enviern fain per avair avunda. Quai saja dentant la meglra soluziun per evitar ulteriurs stgarps da nursas.
