La populaziun e la derasaziun dal luf en Svizra crescha ad in crescher. Actualmain vivan var 250 lufs en Svizra ed almain 26 trieps. Correspundentamain èsi da far quint durant la stad d’alp cun dapli donns vi dals animals da niz. Las mesiras per proteger las muntaneras èn ina contribuziun impurtanta per prevegnir a donns. Per sustegnair l’economia alpina tradiziunala ha la Confederaziun concedì quest onn meds finanzials supplementars da totalmain 4 milliuns francs per rinforzar la protecziun da las muntaneras. Uschia duain vegnir finanziadas differentas mesiras immediatas.
Mesiras adattadas
L’Uffizi federal d’ambient BAFU ha analisà las mesiras da l’onn passà e fatg adattaziuns nua ch’igl aveva dà difficultads da realisar quellas. Er quest onn pussaivel:
- confinanziar il persunal d’agid
- promover alloschis mobils sin alps allontanadas
- dumandar pauschalas per rinforzar saivs
Confederaziun – chantun – possessur
Possessuras e possessurs d’animals da niz survegnan la pussaivladad d’inoltrar dumondas als chantuns per finanziar mesiras immediatas. Ils chantuns dumondan in sustegn finanzial a la Confederaziun, quel surpiglia maximalmain 80% dals custs. Las mesiras d’urgenza che la Confederaziun ha concludì supplementarmain per la stad d’alp 2023 cumpletteschan las mesiras cumprovadas per proteger las muntaneras (chauns da protecziun da muntaneras, saivs) e vegnan integradas en l’agid d’execuziun existent per proteger las muntaneras.
Per sustegnair meglier l’execuziun da la protecziun da las muntaneras e dal management dal luf planisescha il Cussegl federal d’adattar l’ordinaziun da chatscha.
Or da l'archiv:
