Suenter che la vischnanca burgaisa ha decis da vulair metter a disposiziun il terren sin dretg da construcziun per realisar il project ScuolSolar, decida questa dumengia er la populaziun sche la vischnanca politica dat il consentiment per il project sco tal e sch'er ella dat liber terren sin dretg da construcziun.
In sguard sin il parc solar
Populaziun plitost sceptica
Il tenor sin las vias da Scuol è plitost critic. Betg il project sco tal, mabain las dimensiuns rendan sceptics abitantas ed abitants da Scuol. Ils var 92'000 panels solars sin ina surfatscha da 77 hectaras destrueschian numnadamain la cuntrada.
Capo communal da buna speranza
Aita Zanetti, la presidenta communala da Scuol, è conscienta da la surfabricaziun da la cuntrada. Sco regiun turistica sajan ins però avisà sin avunda energia, oravant tut l’enviern. Cun il territori previs sur Bos-cha, a l’ur dal territori da skis Motta Naluns hajan ins chattà ina surfatscha ideala, er pervia ch’i dat gia ina infrastructura existenta d'implants da skis.
La dumengia decida la populaziun a l’urna davart il project. Sch'i dat in Na, na dettia quai tenor Aita Zanetti nagin plan B a Scuol. I na saja lura betg realistic da cumenzar anc ina giada da null, cunquai che la Confederaziun subvenziunescha be projects ch'èn parzialmain vid la rait fin la fin da l’onn 2025.
«Nus stuain dar gas»
Sche la Svizra vul vegnir libra da las energias fossilas, stuain nus almain redublar il tempo da construir indrizs solars sin ils tetgs en la Bassa. Dentant dovria ulteriurs indrizs sco ils parcs solars en las muntognas, di Jürg Rohrer, docent da la Scola auta per scienzas applitgadas da Turitg (ZHAW). Pia «in e l’auter» e betg «in u l’auter».
Resalvas ha l'expert areguard il focus dal solarexpress, da quasi be generar dapli energia, enstagl da spargnar ella. Il potenzial da spargn saja numnadamain considerabel cun almain in terz che nus «sfarlattian».
