La communitad da burgais da Scuol sco proprietaria dal terren ha dà il dretg da construcziun per il project «ScuolSolar». Senza questa decisiun avess il project fatg naufragi. Ussa dastg’ins proseguir cun la planisaziun e la finamira è d’inoltrar a temp il project tar la Confederaziun per profitar dals daners dal «Solarexpress».
Previs è la realisaziun dad in implant fotovoltaic sur Scuol en vischinanza da las pendicularas Motta Naluns. Il project actual prevesa investiziuns da radund 100 milliuns francs sin ina surfatscha maximala da 77 hectaras. Quest implant fotovoltaica producescha forza per radund 20’000 chasadas.
Recurs encunter la vischnanca politica
Dentant è entrà in recurs encunter la vischnanca da Scuol areguard la radunanza communala dals 21 d'avust 2023 che ha tractà il project solar, quel è pendent tar la dretgira administrativa. Quest recurs na sa drizza betg encunter il project sco tal.
Sco proxim sto la populaziun da Scuol decider davart dal project, quella votaziun ha lieu ils 24 da settember 2023.
