Quest onn na vegnan durant la chatscha auta betg be schluppettads tschiervs, chamutschs e chavriels, mabain stattan er lufs sin la glista. Las chatschadras ed ils chatschaders na pon però betg schluppettar en l’entir chantun lufs, mabain els vegnan dads libers be en tscherts lieus. Tgenins lufs che pon vegnir schluppettads ed er ils lieus precis, quai decida la Confederaziun fin la fin da quest mais.
![Übersicht Wolfspaare und Rudel im Kanton Graubünden](https://www.rtr.ch/static/cms/images/960w/ffa3fb1.jpg)
Scolaziun per chatschadras e chatschaders
Chatschadras e chatschaders ch’èn interessads da sustegnair l’Uffizi da chatscha e pestga dal Grischun tar la chatscha da lufs han d’absolver ina sairada d’infurmaziun e scolaziun. Il motiv che questas sairadas han lieu en l’entir chantun saja l’integraziun en la chatscha auta. Numnadamain po mintga chatschader ir en l’entir chantun a chatscha, di Arno Puorger, il responsabel per animals da rapina dal Grischun.
L’uffizi da chatscha po inoltrar quest’emna la dumonda da regulaziun da lufs tar la Confederaziun. Quella dat fin la fin da quest mais il permiss final. Curt avant la chatscha auta è pia cler nua e tge lufs che pon vegnir sajettads.