Pervi dal recurs dad intginas organisaziuns da la protecziun da l'ambient na po il chantun betg regular tut ils lufs sco giavischà. 11 lubientschas da sajettar èn sistidas, enfin ch'il recurs, ch'èn vegnids enconuschents entschatta december, èn tractads davant Tribunal administrativ federal. Sco la regenza ha communitgà, hajan ins sajettà il december quatter lufs.
La blera naiv haja fatg grev da pudì tiers ils lufs. Quels sajan sa retratgs suenter ch'i ha navì uschè fitg. Plinavant hajan ins en blers lieus era stuì interrumper la chatscha speziala. Quai munta che las chatschadras ed ils chatschaders han strusch gì la pussaivladad da sajettar ils lufs. Ils quatter lufs sajan vegnids sajettads da la guardiaselvaschina.
Grond na vegnia quest dumber betg pli a sa midar, perquai che la chatscha speziala va a fin mesemna. Per l'auter onn vul il chantun augmentar il persunal. I duai dar tschintg novs posts per la guardiaselvaschina. Ins haja constatà che quels hajan adina dapli da far cun la chatscha sin ils lufs.
Otg lufs gia sajettà la stad passada
Oriundamain aveva il chantun la lubientscha da sajettar 44 lufs. Da quels ha il chantun sajettà 8 lufs la stad passada. Il recurs da las organisaziuns da la protecziun da l'ambient ha bloccà 11 lubientschas. Dals lufs lubids èn il december vegnids sajettads 4.
