Il mars 2023 avevan ils votants e las votantas da San Murezzan approvà il credit, per construir ina chasa d’abitar per persunas indigenas. Il bajetg è planisà direct dasper la nova chasa da tgira Du Lac.
L’entschatta avrigl cumenzan las lavurs da construcziun per engrondir la garascha sutterrana Du Lac. Sin quella vegn lura construida la nova chasa d'abitar, sco la vischnanca da San Murezzan communitgescha. Las lavurs sco il chavar ed ils transports dal material sajan coordinadas cun las lavurs finalas vi da la chasa da tgira Du Lac. Uschia possian ins evitar davent da l’atun 2024 lavurs cun emissiuns, che pudessan disturbar l’avertura da la chasa da tgira.
En fasa da projectaziun
La projectaziun da la chasa d’abitar per indigens na saja anc betg terminada, scriva la vischnanca da San Murezzan vinavant. Las lavurs da la planisaziun generala sajan vegnidas scrittas ora publicamain il favrer. La fin da zercladur duai la procedura esser a fin. E la primavaira 2025 spera San Murezzan da pudair cumenzar cun la construcziun da la chasa.
L’engrondiment da la garascha sutterrana e la chasa d’abitar èn projects da la vischnanca San Murezzan. Las vischnancas Segl e Silvaplauna che realiseschan ensemen cun San Murezzan la chasa da tgira Du Lac, n’èn betg involvidas.
Or da l'archiv
Avant stgars trais onns han cumenzà las lavurs per la chasa d'attempads Du Lac a San Murezzan.
