La vischnanca da San Murezzan vul construir abitaziuns per indigens. Prevesida è ina chasa cun 18 fin 36 abitaziuns sin l'areal Du Lac, dasper la chasa da tgira ch'è actualmain en construcziun. Previs è che la chasa vegnia ad esser pronta il 2025. Davart il credit da construcziun da radund 20 milliuns francs decida il suveran da San Murezzan ils 12 da mars 2023.
Nova infrastructura per la plazza da campadi
La plazza da campadi San Gian duai survegnir ina nova infrastructura: in nov edifizi cun bogns e tualettas. Il project vegn a custar bunamain 3,8 milliuns francs. Fin il 2024 duai il nov edifizi esser pront. Il cussegl communal ha deliberà la missiva unanimamain per mauns da la votaziun a l'urna ils 12 da mars 2023.
Nov lai da fermada sin la Corviglia
Sco terz project ha il cussegl communal discutà sur da la construcziun d'in ulteriur lai da fermada en il territori da skis Corviglia. Il lai cun num Nair Pitschen duai vegnir construì sut la staziun a val da la sutgera FIS ed avair plazza per var 300'000 meters cubics d'aua. L'aua duai vegnir pumpada si dal lai da fermada existent Lej Alv. Cun l'aua da tuts dus lais pon las pendicularas ennavar en avegnir l'entir territori da skis Corviglia/Marguns senza stuair duvrar aua da funs.
Per pudair realisar il project sto il suveran da San Murezzan acceptar la revisiun parziala da la planisaziun locala ed era dar a la Engiadina San Murezzan Mountains SA ils dretgs da construcziun. Ils custs da 12 milliuns francs per la construcziun dal lai portan las pendicularas. Era davart quest project decida il suveran da San Murezzan ils 12 da mars 2023.