La suprastanta communala Priska Anand ha infurmà il cussegl communal da San Murezzan davart ils motivs. Dad ina vart sajan las lavurs da construcziun dal fundament stadas pli cumplitgadas ed en consequenza pli charas che spetgà. Là sajà resultà in plus da 3,1 milliuns francs.
Entant saja dentant era la chareschia daventada in factur decisiv. Quel fatscha ora in plus da 15%, u 7,7 milliuns francs. Tiers saja vegnì che la concurrenza n'haja betg giugà tar la surdada da lavurs. Cunquai che las firmas hajan gì ils cudeschs plains, haja il maun public survegnì mo paucas offertas. Sut il stritg fan ins damai quint cun custs da 63,8 milliuns francs.
Da l'autra vart dettia quai dentant era good news, ha Anand ditg enavant. Uschia hajan ins pudì prender suenter l'urari, l'avertura saja prevesida per l'emprim da november 2024.
