La gruppa da lavur, stgaffida da las 12 vischnancas da la regiun, s'imaginescha d'ina vart inscunters tranter indigens e fugitivs. Ed ella tschertga persunas da contact localas per dumondas dal mintgadi.
Da l'autra vart dovria persunas cumpetentas per instruir la lingua tudestga, ed eventualmain il talian, scriva la Regiun Malögia. Ed er ils uffants da scola ord l'Ucraina duain emprender tudestg, per ch’i giaja pli simpel d’arrivar en l’Engiadina.
Var 50 fugitivs ucranais sajan arrivads en l'Engiadin'Ota, di Andrea Gilli, il president da la regiun Malögia. Perquai ch'i vegnia adina pli blers, saja impurtant dad esser preparà.
