La scola primara da Laax ha per il mument trais fugitivs da l’Ucraina en lur classas. In mattet en terza classa, e las soras Anna e Varya en quarta e sisavla classa. I na dat betg in program da suandar per integrar il nov scolar e las novas scolaras. Uschia vegn organisà tut intern e la magistra Marina Bearth emposta meds d’instrucziun u metta sezza ensemen material. Lecziuns da rumantsch e tudestg han ils uffants ch'èn arrivads nov tar ina pedagoga curativa. En auters roms sco matematica, art, musica e sport sa participeschan els a la lecziun normala.
Ina sfida è da metter en pe in program uschè spert sco pussaivel per sustegnair els da s'integrar ed en il medem mument betg laschar l'atgna classa or dals egls.
Nagina barriera da chapientscha
Sch’els san gia englais alura èsi in grond gudogn per nus, pertge alura savain nus communitgar in cun l'auter.
Anna e Varya, las dus soras èn d'Odessa, ina citad en il sid da l’Ucraina. Ellas vegnan integradas uschè bain sco pussaivel en la scola da Laax. Ina sfida è la lingua, l'alfabet da la lingua ucranaisa ha auters segns che noss alfabet latin. Però cun quai che las mattas san gia englais, pon ellas communitgar bain cun ils auters. Er las scolaras ed ils scolars da Laax emprendan a partir da la tschintgavla classa englais.
Quai è cool, els ma san far chapir rumantsch e tudestg ed jau poss mussar ad els la lingua ucranaisa e russa.