Ils chantuns survegnan supplementarmain 3'000 francs per persuna fugida ord l'Ucraina. Cun questa decisiun vul il Cussegl federal cunzunt promover ch'ils fugitivs pon emprender ina lingua. Ina maioritad dals chantuns era da l'avis che la summa da 3'000 francs saja memia pitschna a vista mesauna. Il Cussegl federal vul dentant restar tar quella pervia dal svilup intschert, e dal status S che metta paisa sin la perspectiva da returnar en la patria.
Ils chantuns sajan gia vid planisar purschidas correspundentas. Quai ha Gaby Szöllösy, la secretaria generala da la Conferenza da las directuras ed ils directurs socials dals chantuns, ditg la gievgia passada avant las medias. Sper curs da linguas sajan er occurrenzas d'infurmaziun en planisaziun.
Per ils fugitivs da l'Ucraina vala dapi mez mars il status S. Il Cussegl federal paja als chantuns per persuna 18'000 francs per alloschi, assistenza sociala e provediment medicinal. Tar quella summa vegnan anc 3'000 francs vitiers.
