Mintga fracziun ha ina suprastanta u in suprastant, uschia la definiziun suenter la fusiun dal 2009. Ma la finamira da chattar glieud ha demussà quant difficil ch'igl è da chattar persunas che vulan s’engaschar. Oz èn duas persunas da Lü, trais da Tschierv, e mintgamai ina da Sta. Maria e Müstair.
La suprastanza communala da Val Müstair ha proponì a la radunanza da reducir la suprastanza da set sin tschintg persunas. Plinavant proponan ins da diminuir la cumissiun da construcziun e plinavant er il cussegl da scola da tschintg sin trais persunas. Quellas midadas – pia la revisiun da la constituziun communala – èn vegnidas acceptadas da la radunanza communala, quai cun 125 vuschs, dals 136 preschents.
Per la presidenta communala Gabriela Binkert-Becchetti daventian ins uschia pli effizient. L’idea fiss che mintga persuna suprastanta sa concentrescha pli fitg sin la lavur strategica e surdat singulas lavurs organisatoricas a l’administraziun communala.
Dapli schelta
En ils davos onns èsi adina vegnì pli grev da chattar persunas che s’engaschan per la vischnanca sin nivel politic. Cun be tschintg persunas vegnia la schelta pli gronda e lura saja la pussaivladad da chattar persunas er pli gronda, uschia la presidenta communala.
Cunquai che la radunanza ha dà glisch verda a las midadas, ha lieu la votaziun a l’urna ils 3 da mars. La finala sto er la Regenza grischuna consentir las midadas. La finamira saja d'inoltrar la constituziun communala surlavurada a partir da l'onn 2025.
Program 2025-2028 da Biosfera
La radunanza communala ha approvà unanimamain il program dal parc da natira Biosfera Val Müstair per ils onns 2025 enfin 2028.
