Actualmain planisescha la vischnanca da Val Müstair cun investiziuns da var 17 milliuns francs en ils proxims onns. Tranter auter duai er dar ina nova scola centralisada. Sco che la populaziun è vegnida infurmada tar la radunanza communala dals 22 da november duain ils custs da quella vegnir sbassads. Il project actual fa quint cun custs da 8 milliuns. Tenor la presidenta communala Gabriella Binkert Bechetti fiss in tala scola dentant in pau in project da luxus. Nov duai la gruppa da lavur redimensiunar il project sin 5 milliuns francs.
Il credit definitiv duai lura vegnir davant la radunanza communala il schaner 2024. Durant las lavurs da construcziuns, che duessan cumenzar ils 2024, pudessan tut las scolaras ed ils scolars ir a scola a S. Maria, la scolina restass a Valchava. Suenter vegnissan lura la scolina e la scola a Müstair en la scola centralisada, il plan fiss da finir la scola per il 2026.
