Sco la Fundaziun da provediment da sanadad Engiadin'Ota (SGO) scriva, hajan ins decis ensemen cun il cussegl administrativ «d'examinar fundadamain» ina fusiun cun l'Ospital chantunal a Cuira.
In'analisa haja mussà che l'integraziun da l'ospital regiunal en l'ospital chantunal porschia las meglras premissas per segirar il provediment da sanadad per la populaziun en Engiadin'Ota a lunga vista. Ils proxims mais vegnian ils detagls da la fusiun elavurads.
La integraziun meglierass l’effizienza en las spartas da persunal, medischina, administraziun ed informatica, sco la SGO scriva vinavant. Ils centers da vegls, la spitex, ils posts da cussegliaziun e las immobiglias restian tar la SGO.
Il suveran da las vischnancas da l'Engiadin'Ota po en l'emprima mesadad dal 2025 decider a l'urna sur dal project.
Segirtad finanziala
Era en vista finanziala dettia la fusiun segirtad a las vischnancas per la planisaziun. Quest onn aveva l'ospital stuì dumandar in credit supplementar da 5 milliuns francs tar las vischnancas. L'analisa haja mussà ch'igl duvrass en il futur anc ina giada ina summa sumeglianta supplementara da las vischnancas – sche l'ospital restass independent. En ospitals èn 70% dals custs per purschidas staziunaras e 50% dal custs per purschidas ambulantas independentas dals pazients. I duvrass radund 10'000 pazientas e pazients staziunars per cuvrir ils custs. La regiun saja – malgrà blers turists e turistas – memia pitschna per quest volumen.
Reducziun da persunal cun plan social
Sco la SGO scriva vinavant, vegnia l'Ospital chantunal a Cuira a surpigliar da princip il persunal. Scolaziuns possian en tutta cas vegnir finidas. Ina reducziun da plazzas – per cuntanscher ils respargns necessaris – possia vegnir fatga per gronda part senza stuair visar plazzas. Quai grazia a la gronda fluctuaziun da persunal en il sectur da sanadad. Sche quai na saja en singuls cas betg pussaivel dettia in plan social cun sustegn individual per las singulas persunas.
Midada al timun
La SGO communitgescha plinavant che la CEO Susanne Stallkamp dat giu per immediat la plazza. Per ella surpiglia ad interim Rolf Gilgen, commember dal cussegl administrativ. El haja passa 20 onns experientscha da manar ospitals. Tranter auter sco CEO da l'ospital Bülach e directur dal spital Waid da la citad da Turitg.