La vischnanca da Samedan è possessura da radund in terz da la parcella previsa. Cun il Gea da la radunanza communala da gievgia saira han votantas e votants da Samedan decidì ch'il contract da servitut per questa parcella va en vigur. La parcella communala è 7,5 hectaras gronda. Las discussiuns ch'igl ha dà a la radunanza communala na gievan per gronda part betg per dumondas en connex cun la fatschenta da la parcella, mabain per detagls tecnics da l'indriz.
Ils contracts cun ils possessurs privats da las ulteriuras parcellas relevantas per il project èn gia suttascrits. Il president communal da Samedan Gian Peter Niggli è s'abstegnì da la vusch perquai ch’el è in dals possessurs da terren che vegn duvrà per l’implant solar.
Saira d'infurmaziun oravant
Radund 60 persunas han piglià part ad ina saira d’infurmaziun davart il project fotovoltaic en vischinanza da la plazza aviatica a Samedan. Il project è vegnì redimensiunà per radund in terz. Da nov vegn quel a producir radund 18 uras gigawatt per onn. Vul dir: Il project fotovoltaic producescha tant sco la vischnanca da Samedan dovra en in onn. Il nov project vegn a custar tranter 40 e 48 milliuns francs.
L'implant en survista:
- 14,5 MW / 18,8 GWh/onn / 47% producziun d'electricitad d'enviern
- cumpact cun mesiras da 300 m x 700 m
- pussaivel da duvrar il terren sin pliras modas e manieras
- plivalur per la vischanca, damanaivel dad infrastructura existenta
- vasta basa per l'indirz: da datas per la producziun a lunga vista, contracts cun posessurs da terren sco er per l'access a la rait, examinaziun detagliada dal terren
Anc dus recurs averts
In recurs ha fatg la Infra, la possessura da l’infrastructura da la plazza aviatica regiunala Samedan. Cun els sajan ils responsabels en stretga discussiun per evitar respectiv chattar ina schliaziun senza proseguir cul recurs. Il segund recurs vegn dad ina gruppa d’interess «Na al implant solar Samedan». Quella gruppa crititgescha ch'il project saja vegnì redimensiunà senza infurmar a la populaziun. Quel recurs è anc pendent.
Enfin la fin dal onn 2025 ston 10% dal fabricat esser en funcziun per survegnir raps da la Confederaziun. Quella finamira vulan ils responsabels cleramain ademplir.
655'000 francs a l'Ospital Engiadin'Ota
La radunanza communala da Samedan ha approvà gievgia saira, cun 112 cunter 80 vuschs, il contract da servitut per construir in implant solar sin ina parcella communala.
Plinavant è in credit supplementar da 655'000 francs vegnì approvà per l'Ospital Engiadin'Ota. Cun quai han uss tut las 11 vischnancas purtadras approvà lur cumpart per la finanziaziun supplementara da tschintg milliuns francs.
Or da l'archiv:
