La FMR ha retschertgà nua ch’i dat ponderaziuns per implants fotovoltaics en il chantun Grischun. A Scuol, Samedan ed a Tujetsch existan en tut quatter projects ch’èn gia pli avanzads. A Zuoz, Poschiavo, Surses, Glion, Lumnezia ed a Mustér vegnan fatgas emprimas evaluaziuns.
Igl è ina veritabla cursa encunter il temp. Fin il 2025 ston ils implants furnir 10% da l’energia, uschiglio na paja la Confederaziun naginas contribuziuns. Damai che lezzas èn generusas – fin 60% da l’investiziun – han bleras vischnancas e plirs concerns mustgas da profitar. Ils gronds concerns d’energia fan tuts examinaziuns per implants, ma na vulan anc betg tradir ils lieus.
Nus evaluain plirs lieus en il Grischun e betg mo in. Igl è però anc memia baud da communitgar nua.
Tar l’offensiva solara sa tract quai da mega-implants. Enfin uss na datti nagut cumparegliabel en Svizra ed era betg en autras regiuns muntagnardas. Da realisar in tal implant uschè svelt è ina sfida nunditga. Lieus ch’èn senza via d’access u lingias d’electricitad han be pitschnas schanzas dad eriger entaifer il termin prescrit in tal implant. Plinavant sto era il chantun festinar cun examinar ils projects e dar las permissiuns necessarias.
