La Punt Chamues-ch teman da perder qualitad: e di Na
La vischnanca da La Punt Chamues-ch ha sco emprima vischnanca decidì cunter l’integraziun da l'ospital Samedan en l’Ospital chantunal, quai cun 45 vuschs Na cunter 36 Gea e 4 abstenziuns. Oravant a la decisiun è vegnida manada ina discussiun animada da radund ina ura e mez.
Tenor ils votums ch’en vegnids fatgs durant al radunanza communala teman las votantas ed ils votants preschents oravant tut ina diminuziun marcanta da la qualitad medicinala, plinavant na saja betg vegnida analisada fundadamain ina collavuraziun tranter la Clinica Gut a San Murezzan e l’ospital a Samedan.
Radunanza communala da Samedan di entant Na
La radunanza communala da Samedan è la gievgia saira s’exprimida cun 139 a 70 vuschs cunter quest'integraziun en l'ospital chantunal. L’ospital a Samedan duaja restar independent. Dentant cunquai che las obligaziuns finanzialas da la vischnanca Samedan surpassan 3 milliuns francs tar in’integraziun, dovri ina votaziun a l’urna. Quella è ils 18 da matg. Da tractar la fatschenta en la radunanza communala ha perquai be gì in caracter predeliberant.
Che la radunanza communala da Samedan è s'exprimida cunter ina fusiun, deplorescha la fundaziun Provediment da sanadad Engiadin'Ota (SGO). Integrar l'ospital regiunal a Samedan en l'ospital chantuna a Cuira e la collavuraziun cun la Clinica Gut a San Murezzan – ch'è colliada cun questa decisiun – saja anc adina la meglra opziun per segirar in provediment da sanadad ch'è era economicamain purtabla. La fundaziun spera che l'opiniun da la populaziun da Samedan vegn a sa midar fin la votaziun a l'urna ils 18 da matg. Tar in Na avess'ins vinavant ils problems structurals perquai che restar independent saja economicamain betg rentabel.
Las vischnancas decidan davart il futur da l'ospital Samedan
Co segirar il provediment da sanadad en l'Engiadin'Ota? Da quai èn ils ultims mais sa fatschentads differentas instituziuns sco la fundaziun Provediment da sanadad Engiadin'Ota (SGO), las vischnancas sco er la populaziun. L'ospital Samedan ha numnadamain, sco blers auters ospitals en Grischun ed en Svizra, difficultads finanzialas. Ils custs èn creschids marcantamain, las entradas èn pli bassas. Quai haja manà ad ina gronda perdita da 5 milliuns francs en il quint annual 2023 da l’Ospital regiunal Samedan, uschia che l'ospital ha l'onn passà duvrà in credit supplementar da 5 milliuns francs da las vischnancas.
Integrar l'ospital Samedan en l'ospital chantunal?
Per betg far tals deficits pli en l'avegnir, èn vegnidas elavuradas quatter variantas per segirar il provediment da sanadad en la regiun.
Il cussegl da fundaziun da la fundaziun Provediment da sanadad Engiadin'Ota è sa decis unanimamain per la varianta d'integrar l'Ospital da l'Engiadin'Ota en l'Ospital chantunal dal Grischun. Questa mesira duai segirar a lunga vista il provediment da sanadad en Engiadin'Ota ed en las regiuns cunfinantas. L'integraziun vegn sustegnida dal departament chantunal da giustia, segirezza e sanadad. La finamira è da meglierar la situaziun finanziala da l'ospital.
Questa primavaira decidan las votantas ed ils votants da las vischnancas da l'Engiadin'Ota definitivamain a la radunanza communala u a l'urna davart l'integraziun da l'ospital Samedan en l'ospital chantunal da Cuira. Per far il pass d'integraziun, dovri in Gea da tut las 11 vischnancas. En cas d'in Na veglian ins tschertgar il discurs e persvader la vischnanca pertutgada per in'ulteriura votaziun, uschia ha ditg Christian Brantschen, il president da la SGO.
Ospitals grischuns en la crisa – Problems ed eventualas schliaziuns
Blers ospitals grischuns han problems finanzials. Plirs facturs chaschunan rusnas en las cassas, uschia che las bleras clinicas ston guardar per dapli funtaunas ed entradas, ubain reducir ils custs. E reducir ils custs va per il solit maun en maun cun reducziun da purschidas e da persunal.
RTR ha analisà la situaziun actuala (23-01-2025) per mussar ils problems ed eventualas schliaziuns.