Avegnir ospital Samedan - Varianta d’ina integraziun en l’ospital chantunal è il favurit

La Fundaziun provediment da sanadad Engiadin'Ota (SGO) e l’Ospital chantunal dal Grischun a Cuira lavuran vi da la strategia per metter ensemen las duas gestiuns. Las duas organisaziuns han preschentà in rapport intermediar en chaussa. Quai en vista a las votaziuns davart l'avegnir da l'ospital regiunal Samedan che stattan avant porta.

Cifras stimadas e dumondas avertas

Las cifras mussian ch'ina integraziun da l'ospital a Samedan en quel da Cuira fetschia senn. Quellas prevesan a partir da l'onn 2029 cura che la midada fiss finanziada e suenter ina garanzia da deficit da 4.35 milliuns francs.

Cun la varianta alternativa - per uschedir il status quo optimà - e restar independent, avessan las vischnancas da la Regiun Malögia da surpigliar bunamain 9 milliuns francs mintg'onn.

Entant na saja però betg cler sche la fusiun custass plazzas da lavur u eir sche partiziuns stuessian vegnir serradas en il ospital a Samedan. Tut en tut para la varianta da l'integraziun en l'ospital chantunal però da dar dapli segirtad da planisaziun sco er da pudair garantir prestaziuns e partiziuns en cumparegliaziun cun las autras variantas evaluadas. Perquai preferescha la SGO la varianta cun Cuira. En in proxim pass duessan vegnir elavurads ils detagls dal project. Quai avant che la la dumonda davart la maridaglia cun Cuira vegn suttamessa la primavaira che vegn a la populaziun da l’Engiadin’Ota.

Impressiuns da la sairada d'infurmaziun