Engiadina Bassa - Il luf vegn uschè segir sco la primavaira

Adina dapli persunas inscuntran il luf, han vis l'urs u forsa schizunt il luf-tscherver. En Engiadina Bassa s'augmenta il dumber da lufs e perquai vul l’uffizi agir ed infurmar davart la situaziun ed era dar recumandaziuns co reagir tar in inscunter.

Lufs a Zernez e Scuol

A Zernez datti gia in triep da lufs, a Scuol èsi vegnì observà in pèrin ed a Valsot han ins observà singuls lufs. La populaziun vegnia a crescher, da quai è il referent a la saira d’infurmaziun, Arno Puorger, responsabel per animals da rapina gronds tar l'Uffizi da chatscha e pestga, persvadì.

Schebain che l'urs n'è betg vegnì registrà en il Grischun durant l’onn 2023 stoppian ins far quint cun quel er ils proxims onns. En il Trentino en l'Italia vivan radund 100 urs, e singuls, oravant tut mastgels, chattian segir la via fin en Engiadina. Plinavant hajan ins er observà pli savens il luf-tscherver, uschia ch'era quel sa derasia probabel en l'avegnir, ha declerà Arno Puorger.

Passa 200 persunas han visità la saira d’infurmaziun organisada da l'Uffizi da chatscha e pestga. Per l'uffizi è quai in'impurtanta plattafurma per infurmar a temp, appellar d’annunziar observaziuns ed oravant tut dar recumandaziuns co sa cumportar envers la preschientscha dals animals da rapina gronds.