Sco che Fadri Bisatz, CEO dal «Spital regiunal Surselva» declera, na tanscha cunzunt la tariffa ambulanta betg per cuvrir ils custs. Quai saja anc mender, perquai che adina dapli cas vegnan tractads ambulant che vegnivan pli baud tractads staziunar. Era na sajan las tariffas betg vegnidas adattads a la chareschia.
Sch’in econom guardia mo las cifras, sche saja quai ord sia vista in commando da suicidi absolut, di il schefmedi Marcel Bundi. Ins stoppia dentant era resguardar che l'ospital a Glion ha ad onn «mo» 2'400 pazients staziunars, dentant era plirs milli pazientas ad onn che vegnan tgiradas ambulantamain.
Tgi duai far quai – sche betg nus?
L'ospital sto avair pront ina sala d'operaziun entaifer paucas minutas e quai per 365 dis ad onn durant 24 uras. Quai includa er il persunal per la sala d'operaziun, in medi d'anestesia e tgira da narcosa. Era persunal da radiografia, da labor e da tgira sto esser preschent di e notg. Quai tut per ademplir l'incumbensa da l'ospital. Tenor Marcel Bundi, il schefmedi da l'ospital, è quai la pli nunrentabla part da l'entira istorgia.
