A l'ur da la fracziun da Ftan Pitschen ha ina famiglia mess a disposiziun duas parcellas per fabritgar chasas da prima proprietad. Previs èsi da stgaffir ina cooperativa da construcziun da chasas. Tenor l'architect incumbensà, Chasper Cadonau da Ramosch, preves'ins da fabritgar sis abitaziuns pajablas per indigens.
Trais recurs encunter project
Ils vischins da las duas parcellas han inoltrà recurs. Tar ils vischins sa tracti surtut da possessurs da segundas abitaziuns. La vischnanca da Scuol ha decretà ina zona da planisaziun sin tut il territori communal. Ils recurrents pretendan che la vischnanca na dastga betg consentir quella dumonda da bajegiar uschè lunsch che la zona da planisaziun è existenta e valabla.
Plinavant ha in giurist, che represchenta plirs possessurs, infurmà RTR ch'ils possessurs e vischinas da las parcellas na sajan betg vegnids infurmads oravant sur dal project. Plinavant hajan els inoltrà ils recurs per vegnir insumma ad infurmaziuns sur da l'intent.
Sur da la procedura currenta na datti naginas infurmaziuns, uschia il giurist incumbensà.
L'architect sa dosta
L’architect Chasper Cadonau ha crititgà publicamain cun in post sin la plattafurma Facebook ch'ils possessurs da segundas abitaziuns veglian conscientamain evitar la construcziun dad emprimas abitaziuns. La situaziun da spazi da viver per indigens saja fitg difficila, tenor l’architect. Famiglias indigenas na chattian nagin spazi da viver pajabel. La surfabricaziun planisada a Ftan na cuntrafetschia betg a la lescha veglia ed era betg a quella previsa en la nova lescha, uschia Cadonau, era cun ina zona da planisaziun sur tut il territori datti la pussaivladad da fabritgar.
El appellescha als recurrents da retrair ils recurs e pussibilitar da fabritgar. Ses post orriund ha el entant stizzà.
La vischnanca da Scuol sezza n’ha anc betg consentì la dumonda da bajegiar. Sche quella vegn consentida u betg è part da la procedura currenta.