A partir da l'auter onn datti pliras midadas en la suprastanza da Val Müstair. Per l'ina vegni mo pli a dar quatter commembers e commembras, enstagl da set. Per l'autra sa midan las fatschas dal gremi per la proxima legislatura. Tuts, auter ch'in suprastant han numnadamain demissiunà – saja quai pervia da la reelecziun da Gabriela Binkert Becchetti sco presidenta communala u pervia d'autras raschuns .
Da nov en la suprastanza fin il 2028 han las votantas ed ils votants elegì: Leonora Leu-Falett, Jachen Armon Pitsch e Riet Scandella. Il meglier resultat ha fatg Leonora Leu-Falett cun 421 vuschs. La maioritad absoluta era tar 187 vuschs. Il quart sez da suprastanza surpiglia Chasper Stuppan. El è il sulet ch'è sa mess a disposiziun per la reelecziun tar las elecziuns.
Nagina collavuraziun futu ra cun Binkert
La reelecziun da Gabriela Binkert Becchetti ha dà motiv a dus suprastants da bandunar il gremi a la fin da quest onn. Uschia aveva l'impressari Thomas Schadegg gia annunzià, ch'el bandunia la suprastanza en cas ch'el na vegniss betg elegì sco nov president communal.
Era per Ivo Lamprecht – ch’è sa retratg da la cursa per il presidi en il segund scrutini – era cler, ch’el cuntinuescha be cun sia lavur en suprastanza sche Gabriela Binkert Becchetti na resta betg pli al timun da la vischnanca. Omadus avevan crititgà la collavuraziun cun Binkert durant las debattas d'elecziun.
Pliras demissiuns or d'auters motivs
L'actual vicepresident Daniel Pitsch banduna la suprastanza suenter ina legislatura da quatter onns la fin da quest onn. Tenor infurmaziuns da Stephanie Ulayayi-Albertin haja ella gia inditgà tar sia elecziun il mars 2022 da vulair empruvar il pass en il mund politic. Ella saja dentant vegnida a la conclusiun che quel na saja betg ses.
Rinaldo Lechthaler ch'è en uffizi dapi il 2021 ha demissiunà en suprastanza per la fin da quest onn or da motivs privats – el haja da priorisar il temp a favur da sia lavur professiunala.
Suprastanza pli pitschna
La radunanza communala da la Val Müstair aveva approvà il favrer da quest onn, da reducir il dumber da suprastants e suprastantas da 7 sin 5 per la proxima legislatura.