Segl ha ditg Gea a l'iniziativa che vul scumandar da midar emprimas abitaziuns en segundas abitaziuns. A la radunanza communala han ils 167 preschents e preschentas votà per scrutini. 91 han ditg Gea, 74 Na, dus cedels èn restads vids.
Senza ina tala lescha pudessan bundant 61 emprimas abitaziuns vegnir midadas en segundas - quai tenor la suprastanza cummunala da Segl. In argument dals aderents e da las aderentas era che durant la situaziun actuala da la mancanza d'abitaziuns per indigens ed indigenas, saja quai in emprim pass per far frunt al problem. Per ils adversaris e las adversarias da l'iniziativa percunter, stoppian ins tschertgar in'autra soluziun. Quai cun fabritgar dapli abitaziuns, e betg cun chastiar ils possesurs e las possesuras da las abitaziuns pertutgadas.
L'iniziativa ha pia procurà per grondas discussiuns: Ils ins avessan gugent gì ina soluziun pli differenziada e ponderada, las autras ina soluziun radicala. Durant ils ultims trais mais e mez èn vegnidas inoltradas en tut 14 dumondas da transcripziun.
Mancanza da spazi da viver
La mancanza da spazi da viver per indigens ed indigenas procura en l'Engiadin’Ota per grondas discussiuns. Differentas vischnancas tschertgan atgnas soluziuns per cumbatter il problem, uschia era la vischnanca da Segl. Il zercladur da l'onn 2024 aveva la suprastanza communala proponì da scumandar la transcripziun d'emprimas abitaziuns en segundas abitaziuns. Tar construcziuns novas sto tenor la proposta plinavant 50% da la surfatscha star a disposiziun per abitaziuns per indigens ed indigenas. Quella proposta era però vegnida sbittada senza insumma entrar en la discussiun.
Il november 2024 è lura vegnida inoltrada ina nova iniziativa cun 138 suttascripziuns valablas ch'è uss vegnida acceptada.
Naginas bartgas cun motor electric
A l'iniziativa per ina fasa da pilot da trais onns per motors electrics sin il lai ha Segl dentant ditg Na cun 70 vuschs encunter 58 vuschs. En tut èn 128 persunas sa participadas a questa decisiun.
La iniziativa avess vulì pussibilitar per ina fasa da pilot da trais onns il diever da bartgas cun motor electric. Quai surtut per la pestga, uschia il cuniniziant Antonio Walther. El argumentescha ch'ins pudess regular meglier la forella canadaisa cun questas bartgas. La forella canadaisa ha decimà las autras spezias da peschs dal Lej da Segl. In auter argument saja ch'ils motors electrics duain far damain canera ch'ils motors da benzin.
Adversaria da l'iniziativa è stada l'organisaziun Pro Lej da Segl. Quella vul preservar il lai sco quai ch'el è. Sco il president Duri Bezzola declera, s'avriss cun questa iniziativa ina porta per abus. L'organisaziun temess ch'il traffic da bartgas a motor electric pudess er esser grond e disturbar la pasch dal Lej da Segl durant la fasa da pilot.
